Windows 7 vs Gnome, XFCE and LXDE (Linux Desktop Environments)

Windows 7 , Gnome, XFCE and LXDE විසින් අපගේ පරිගණකයේ සම්පත් භාවිතා කිරීම පිළිබදව පොඩි සංසන්දනය කිරීමක් ගැන අවධානය යොමු කරමු.

මෙහෙයුම් පද්ධතියක Kernel එකක් යනු අපගේ ශරීරය වැනි දෙයකි. Desktop Environment යනු අප අදින ඇදුමක් වැනියි. ලොව ජනප්‍රියම මෙහෙයුම් පද්ධති වර්ග දෙක සංසන්දනය කිරීමේදී Microsoft සමාගමේ Windows මෙහෙයුම් පද්ධතිය යනු ශරීරය සමග ඇදුමක්ද අන්දවා එවන එකකි. අපට අවශ්‍ය පරිදි ඇදුම් වෙනස් කල නොහැක. එනම්, Windows මෙහෙයුම් පද්ධතියේ Desktop Environment එක අපට වෙනස් කල නොහැක.

Ubuntu වැනි Linux මෙහෙයුම් පද්ධති වල තත්ත්වය මීට වඩා වෙනස් වේ. ඒ සදහා අපට අවශ්‍ය ඇදුමක් අන්දවා ගත හැකි වේ. අපට අවශ්‍ය පරිදි මෙම ඇදුම වෙනස් කල හැකිය. එහිදී ලස්සන ඇදුම්, සරල ඇදුම්, සාමාන්‍ය ඇදුම් ආදී විවිධ ඇදුම් ඇත. තේරෙන භාෂාවෙන් කියනවා නම්, අපට අවශ්‍ය පරිදි Desktop Environment එක වෙනස් කල හැකි වේ. KDE හෙවත් K Desktop Environment යනු ලස්සන ඇදුමකි. එසේම ඒ ඇදුම ඇන්දවීමට පරිගණකයේ වැඩි සම්පත් ප්‍රමාණයක් තිබිය යුතුය. Gnome යනු සාමාන්‍ය ඇදුමකි. KDE තරම් ලස්සන නැත. නමුත්, වැඩක් කර ගැනීමට අවශ්‍ය තරම් ලස්සන ඇත. මධ්‍යම ප්‍රතිපදාවේ ඇදුමකි. වැඩි සම්පත් නැති පරිගණක සදහා XFCE හෝ LXDE වැනි ඇදුමක් ගැලපේ. එසේ වුවත්, අවශ්‍ය වැඩක් කර ගැනීමට අවශ්‍ය සියළු සම්පත් වලින් සමන්විත වේ. වැදගත්ම දේ වන්නේ මේ මොන ඇදුම ඇන්දවූවත් ශරීරය එකම ශරීරයක් වීමයි. එනම් එකම Kernel එක සදහා මේ Desktop Environment අවශ්‍ය එකක් භාවිතා කල හැකි වීමයි.

Windows 7

මෙහිදී මගේ පරිගණකයේ windows 7 විසින් භාවිතා කල සම්පත් ගැන අවධානය යොමු කරමු. එහිදී සාමාන්‍ය භාවිතයේදී CPU Usage 11% වන අතර, RAM වලින් 736 MB මෙහෙයුම් පද්ධතිය මගින් පරිභෝජනය කරයි. අපිට වැඩක් කිරීමට ඉතිරි වන්නේ ඉතා අඩු ප්‍රමාණයකි.

KDE

KDE සාමාන්‍යයෙන් ඉතා අලංකාර ලෙස සකස් කරල තියෙන Desktop Environment එකක්. ඒ වගේම මේක භාවිතා කරන පරිගණකයේ සම්පත් ප්‍රමාණයත් අනිත් Linux DE සමග සාපේෂව බැලුවම වැඩියි. (හැබැයි windows සමග සන්සන්දනය කිරීමේදී ඉතාම අඩුයි. සාමාන්‍යයෙන් RAM 220 MB පමණ)

Gnome

Gnome දෙස අවධානය යොමු කිරීමේදී CPU භාවිතය සාමාන්‍යයෙන් 7.8% වන අතර, RAM භාවිතය 208.1 MB වැනි ප්‍රමාණයකි. එනම්, windows 7 භාවිතා කල RAM වලින් 1/3 කටත් වඩා අඩු ප්‍රමාණයකි.

Xfce

Xfce ගැන බැලීමේදී CPU භාවිතය 5.6% තරම් අඩු ප්‍රමාණයක් වන අතර, RAM භාවිතය 197.5 MB වැනි ඉතා අඩු ප්‍රමාණයකි.

LXDE

LXDE ගැන බැලීමේදී CPU භාවිතය 5.95% තරම් අඩු ප්‍රමාණයක් වන අතර, RAM භාවිතය 171.5 MB වැනි ඉතා අඩු ප්‍රමාණයකි. මෙහි තේමාව වන්නේද Light Weight Desktop Environment යන්නයි.

මේ සංඛ්‍යාලේඛන මාගේ පරිගණකයට අදාලවයි. මේ අනුව ඔබ විසින් ඔබගේ පරිගණකයට අදාලව භාවිතා කල යුතු මෙහෙයුම් පද්ධතිය කුමක්ද යන්න ගැන මෙන්ම Desktop Environment කුමක්ද යන්න ගැනත් අවබෝධයක් ලබා ගත හැකි වනු ඇත. මමනම් බුදුහාමුදුරුවොත් කියල තියෙන විදියට මධ්‍යම ප්‍රතිපදාව හොදයි කියල හිතුන නිසා Gnome භාවිතා කරනවා. ඔබට අවශ්‍ය නම් මේ Desktop Environment තුනම දාලා අවශ්‍ය වෙලාවට අවශ්‍ය එකක් තෝරාගෙන වැඩ කල හැකියි. තවත් Desktop Environment නම් ගොඩාත් තියෙනවා. මෙතන විස්තර කරන්නත් බැරි තරම්. ඒ ගැන පස්සේ වෙලාවක බලමු. මම මෙතන ලිව්වේ මම test කරලා බලපු ඒවා විතරයි.